Psa 121 | KYG | STEP | Nagaemo avelega aulu he'na agesufiye. Haiyategati'mo naha maesiya ya'mo afole aigiye.

Psalms 121

Mono notegamo ugefe nehaiya vaya'mo kate'mo nehai'apae'mo nehaya yokemae

1 Nagaemo avelega aulu he'na agesufiye. Haiyategati'mo naha maesiya ya'mo afole aigiye. 2 Avelegati'mo naha maesiya ya'mo afole o'aigifa Ala kava ne'mo koku'na'e mopa'e'mo alo hu'niya vekamoke'mo naha maegaiye. 3 Yagaino kate'nisigeka aeka halu vale lamika asagauka o'aigane. Yagaino nekateya vekamo au okalegaiye. 4 Afiyo, hu'na, Isaleli vaya'aite'mo yagaino ne'apateya vekamo'a au mai'mai osuge au okalege huteno afa'a mai'neno yagaino maigiye. 5 Ala kava ne'mo'a yagaino nekateya vekamo mai'niye. Ala kava ne'mo'a kahaopale'mo he tino mai'nigeno'ae'mo aune'amo'a uluna vaino nekategeka ani ulunapi'mo ne'maine. 6 Felugamo yegemo'mo kaleno kasaga oligiye. Hani'ilagamo kaimo'mo alino hosu huno okategaiye. 7 Ala kava ne'mo'a alu hosu kava'e alu hosu kavateti'e'mo alino hosu huno okatesiyafe'mo yagaino katesigeno kagupi mafa'nemo alagepa huno maigiye. 8 Nokamo ataleka visanageno'ae'mo Ala kava ne'mo'a yagaino katege atagi neka esanageno'ae'mo yagaino katege huno yagaino kategaiye. Hemenimo yagaino nekateyanageno henaga'amo muki afina'ae'mo yagaino katesigeka alagepa huka afa'a maige maige huka maigane.